UN MUCHA DEN GUERA

     M'a nase na Huanda, asina ku mi tambe a biba aya durante e di dos guera mundial. Día 10 di mei di aña 1940, mi tabatin kasi ocho aña. i no obstante, mi ta korda ainda e oroplanonan bieu aleman, ku tábata pasa riba nos kabes, ora nan tábata invadí nos país. Klaro ku pa e tempo ei, e Messerschmidt i Stukanan ei tábata mashá moderno i pa nos, den nos pueblo banda di Río Waal, yamá Gendt, no muchu leu for di frontera ku Alemania, tábata trata di e promé oroplanonan ku nos a yega di weita. Manera parhanan ta bula, e frontera ku Alemania ta mas of menos 10 kilometer banda pariba di e río Waal, mientras ku nos pueblo ta banda pabou.

     Mi ta korda manera si tábata ayera, ku tábata un día mashá bunita, ku un shelu blou-blou. Te asta mi ta korda kon un trahadó di kunukero a pasa riba kaya dilanti di nos kas, ku su 'klompen' na pia, ku nan tábata sa bisti generalmente ainda e tempon'ei, bisando: "Nan a hera bula mi pèchi fore di mi kabes! ". I mi ta korda tambe, ku nos no a bai skol e día ei. Mundu tábata ainda mash'chikito pa anos, muchanan i probabelmente tambe pa e trahadò di kunukero ei, riba su 'klompen'. Den mi memoria, maske nos pueblo mes ta un pueblo hopi antiguo. Durante reino di emperador romano Claudius, ya kaba tabatin un manshon romano grandi ei yamá "Ganita".

     Sin embargo, ta klaro ku te asta anos, muchanan, tabatin algun noshon vago, ku kosnan peligroso tábata drif den laira. Nos mayornan a papia di e menasa di guera bários biaha kaba, foral na aña 1939, ora, manera m'a siña den mi lès di historia hopi aña despues, Alemania a invadí Polonia. I,naturalmente, tabatin e speransa falso, ku e ministro prásidente di Gran Bretaña Nevil Chamberlain a bin bèk kuné di un reunion ku Hitler, wayando ku orguyo un akuerdo riba un blachi di papel, ku tabatin menos balor ku un pida papel di WC. Nos mayornan mester a tende por lo menos algo di dje, i sobra dje, nan tabatin e ekspektashon ku Alemania lo tábata bai respetá neutralidad di Hulanda, manera nan a hasi durante e promé guera mundial.

     Diadomingo, día 17 di september di aña 1944 tambe tábata un día mashá bunita, ku un shelu blou-blou i un temperatura di verano mashá agradabel. E día ei, nos a admirá e gran kantidat di parashutista aliá, bahando serka di Nijmegen, loke nos por a mira kla-kla, pará i sintá riba e parti plat di dak parti patras di nos kas. I nos tábata sinti nos mes den un estado di húbilo, pasobra nos tábata kere ku nos lo a wòrdu liberá pronto. Ma esei a bira e desapunto di nos bida.

     E maínta ei, oroplanonan di guera aliá a bombardeá barios lugá ku aparentemente nan tábata konsiderá sospechoso, inkluso den nos pueblo unda nan a destruí un "steenfabriek" - es ta: fábrika de apos;baksteen' of 'klinker' - hopi bieu , ku tábata fò'i uzo pa hopi tempo kaba, ma ku tábata w&oograve;rdo mantení komo monumento. E bombardeo ei - e promé ku a tuma lugá den nos pueblo - tambe a stroba misa mayor den misa katóliko, na kuminsamento di nos kaya, pasobra ora e fielnan a wòrdo sorpresá pa e zonido duru di e eksploshonnan, nan tur a bula lanta i a bai lihé-lihé for di misa, mi tata ku nos aserka. P'esei mi ta korda ku tábata un diadomingo.

      Unda mi ta menshon&aacut; "oroplanonan aliá"mi ta uza un término ku nos a siña despues di nos liberashon, na aña 1945, pasobra durante e tempo di okupashon aleman di Hulanda, nos semper tábata referí na "Tommies", esta militarnan britániko, pasobra nos no tábata sa práktikamente nada di otro nashonan enbolbí den kombatimento di e ehérsitonan aleman. Pa nos, tábata Inglatera ku tábata resistí e agreshon di Alemania

     Loke nos no tábata sa, despues di e liberashon di Nijmegen, tábata ku e bataya di Arnhem a frakasá. Ma komo konsekuensia di esei, nos pueblonan a bira trente di bataya ku tiramento di granada - es ta proyektilnan eksplosibo - di tur dos banda pa otro tur día. A tarda kisas dos of tres siman, ku e alemannan - ku naturalmente tábata sa mas ku nos - a tuma e desishon pa evakuá nos. Algun di mi familiarnan a pèrdè nan bida i otronan a keda heridá durante e periodo ei promé ku e evakuashon. Nos no kier a bai, pasobra e 'Tommies'tábata mashá serka, djis un par di kilometer leu di nos, ma nos no tábata sa ku nan no tábata bai bini den nos direkshon.

     Asina ku por fin, despues ku nos a keda evakuá pa e alemannan, nos a biba den un mangasĩn riba tereno di dos fábrika di 'klinker', ku 14 persona: welo, wela, dos primo heridá, tata, mama i ocho yiu, esun di mas yong - mi ruman-homberr menor - nèt dos aña bieu. Nos a parti e mangas&itild;na den dos parti: un parti pa drumi aden - tur 14 di nos huntu - i e otro parti pa biba aden. E invierno ei, nos a sufri hopi hamber. E delaster dos siman, promé ku nos liberashon, nos mester a skonde den e fornonan di e fábrikanan, pasobra e "Tommies" - manera nos tábata yama nan ainda, tábata tira granada pa nos for diotro banda di e río Ijsel.

     Ta mashá lògiko ku nos tábata pensa di militarnan ingles so, pasobra e promé dos aña i mei di guera, tábata Gran Bretaña so, ku a resistí e agreshon aleman, pasobra Estadonan Unĩ no a interbinĩ promé ku 1942, despues di e ataka hapones riba Pearl Harbor día 7 di desember 1941. Ora e guera a kaba, nos a tende e famoso pronunsiamento di Sir Winston Churchill ku referensha na e forsa aéreo real (RAF): "Never have so few, done so much, for so many." (nunka asina pòko hende a hasi asina tantu pa asina hopi hende).

     Nos a keda libára día 18 di aprel 1945,ma nos no por a bai kas bèk ainda, pasobra henter e area tábata pestá di minanan di tera.

     Segun mi esaki lo ta sufishente komo un deskripshon introduktorío mashá kortiko. Mi ke sa ku mi por a skirbi un buki henté tokante di nos eksperenshanan, i tin hende ku a bisá mi mi mester a hasi'é, ma mayoria di hende nasi despues di guera lo no ta muchu interesá, mi ke sa.

     Historia di bèrde mes t a sumamente edukatibo, un kos ku muchu hopi hoben no ta rekonosé, meskos ku hopi politiko populista, segun mi impreshon. Mas leu nos ta alehá di e eventonan ku a tuma lugá, mas tantu nan ta keda bruhá, speshalmente pa esnan ku no a eksperenshá nan. Manera algun tempo pasá, ku tabatin un programa riba televishon hulandes tokante e divishon armá polako, ku a liberá parti di Hulanda. E presentatris di e programa di televishon ei a bisa, ku e poblashon ei di Hulanda tábata mashá sorprendí, pasobra nan a feruagtu solamente kanades i merikanonan. Ku otro palabra, e senora ei, nasí basta aña despues di guera, no tábata sa mes ku anos, bibiendo durante e guera, tábata pensa únikamente di inglesnan. I a propósito, den e bataya frakasá di Arnhem, tambe tabatin un divishon polaka enbolbí, manera nos a haña sa despues. Te asta, pòko despues di guera, tabatin un chasko ku tábata asin' ak': Un pastor, dunando lès di katezashi a puntra e muchanan: "Ken a salba nos?" I un di e muchanan a hisa su dede i a bisa: "E inglesnan.".

     Arnhem ta na un distansia di 18 kilometer riba kaminda, di e pueblo kaminda m'a nase., Nijmegen ta 11 kilometer. Día ku e parachutistanan militar a baha aya - día 17 di september di aña 1944 - e alemannan a purba di bula e brùg riba río Waal (un ramo hancho di río Rijn) na Nijmegen, ma un habitante ku hopi kurashi a logra kòrta e waya di kontrol pa e eksplosibonan. Mi no tin sigur mas kon e shon ei tábata yama, ma mi ke sa ku tábata un tal Jan van Hoof.

     Na aña 1940, durante e invashon di ehérsito aleman, hulandesnan mes a bula e brùg ei, ma el a wòrdo rekonstruí durante e añanan di guera. Mi ta k&ogravce;rda ainda e preshon di aira debí na e eksploshon ei,pasobra anos, muchanan, tábata hungando pafó di kas.

     Promé ku 'D-day' - día 6 di yüni 1944 - e invashon aliá na Normandia, nos no tábata mira hopi aleman den nos pueblonan. Mi ta suponé ku nos 'burgemeester'tábata haña instrukshonnan di un of otro outoridat aleman, ma komo mucha nos no tábata sa nada di esei. Te asta mi ta duda ku e populashon adulto en general tabatin muchu idea di loke tábata pasando. E úniko kos ku mi ta kordatábata ku m'a mira un hende-homber ku un strea hel di David riba su 'jas' i un of otro loko gritando: "duna e hudío ei un pida spèk!". Awó ku mi ta menshoná e evento ei, ta sorprendí mi bastante ku asina hopi hudíu tábata kumpli ku e obligashon ridíkulo ei pa karga un strea hel di David riba nan 'jas', pa nan por a rekonosé nan for di aleu.

     Un kos ku mi ta korda tambe ta ku nos mener di skol di mi klas - tweede klas, si mi no ta herá - a wòrdo detení pa e alemannan, maske nos no tabatin ningun idea pakiko. i un yùfrou mashá bunita i yong a bin ta reemplas'é. Ta strañá mi awó, ku na e edat di ocho aña ei, aparentemente m'hañ'é asina bunita i atraktibo ku mi ta kòrd'é te día di awe, pará aya dilanti di nos, kontando un of otro sprookje. Mi ta suponé ku mi tábata hopi tristu, ora nos mener di klas a bin bèk, ku un barba ku el a krese durante su detenshon. Ma e no a bisa nunka nada di e pakiko ku e tábata detení.

     Te ku 'D-Day', día 6 di juni 1944, generalmente papiá, bida tábata sigui mas of menos manera semper, foral pa nos, muchanan. Klaro ku anos, ku tábata biba den e pueblonan ei, no tábata na haltura di loke tábata pasando, pasobra e alemannan a prohibí poseshon di radio i e pòko liñanan di telefon ku tábata sisti, mashá pòko mes, a wòrdo kòrtá. Pòko tempo despues ku e tropanan aliá a baha na Nijmegen i Arnhem - e "Bridge too far"riba río Rijn - nos tambe a pèrdè koriente eléktriko. Ma nos no tabatin ningun idea pakiko. E úniko persona ku ainda tabatin un radio skondí - nos bisiña karnisero - no por a uz'é mas ora koriente a bai. Tábata un gai hopi prèt, ku, un día, ora soldánan aleman a bin listra su kas, a gara e radio den un deklu i kargando e aparato bou di su kokodèk, el a zundra e alemannan den su dialekto lokal, ku evidentemente nan no tábata komprondé, i el a pasa nan ku su radio, siguiendo su lema: "Si kachó ta ladra, bo tin ku ladra bèk."

     For di e momento ku koriente a bai, nos tábata den problema anochi. E pòko bela ku nos tabata tin ainda a bai lihé-libá i no tabatin zeta di ningun sorto pa linterna antikuá. Ma no a tarda nada pa un solushon imediato. pasobra tur famía na Hulanda tabatin i tin por lo menos un bisikleta , mayoria di nan mas ku un. Anos tambe. No lubidá ku e bisikleta ta e vehikulo di transportashon mas intensibamente uzá riba distansia kortiko na Hulanda. P'e motibo ei nan sa yama hulandesnan hopi biaha e Chinesnan di Europa. Mi welo tábata kòre bais ainda na edat di 92 i mi mama ainda tábata uza su bais pa bai hasi kompra, te ku tres luna promé ku el a muri na edat di 86 aña.

     Antó nos a mara un bais riba un kaha, di modo ku e wil patras tábata keda liber riba flur. i nos tábata hasi turno pedaliando pa produsi lus ku e dinamo di e bais. I ta klaro ku anos, muchanan, tábata kompetí ku otro pa produzsi mas lus , dor di pedaliá mas lihé ku esun anterior.

     Klaro ku un buki manera "A bridge too far" ta duna un historia militar mashá interesante, ma loke ami por konta ta nos mes eksperensia privá no militar i den mi kaso, ta trata di e rekuerdo di un mucha, ku no ta kontené echonan ku por wòrdo verifiká, ku eksepshon di e datonan ku nos a siña despues den nos lèsnan Ldi historia. No tábata solamente anos, muchanan, ku no tábata sa muchu bon kiko tábata pasando, ma nos mayornan tampòko no tábata sa. E pòko informashon ku nan tábata haña di e karnisero, ku tábata skucha e transmishonnan na hulandes di BBC na Londen, yamá Radio Oranje, no tábata kontená muchu detaya. Manera ta bon konosi, famía real di Hulanda ta desendá di Willemn van Oranje - Willem de Zwijger - (1533 - 1584) i ta p'esei ku oraño ta e kolor nashonal di Hulanda. Un di e pòko kosnan ku nos ta korda, ta ku lareina Wilhelmina su dicho faborito na e radio ei tábata: "Sla de mof op z'n kop". Nos tábata uza e palabra "mof", komo palabra ofensibo pa alemannan.

     Pa bisa e berdat, parti di e poblashon di Hulanda no tábata muchu kontento ku e echo ku famía real a hui bai Inglatera ora Alemania a invadí Hulanda. Segun nan, nan mester a keda pa kompartí e miseria ku pueblo mester a pasa aden. Despues di guera,sin embargo, e aktitut ei a kambia por kompleto, ora nan a deskubrí ku rei di Bálgika no a hui, i a bira un marioneta di e régimen aleman. Ta klaro ku ta trata aki di informashon ku nos a haña despues di guera.

     Un sobrino di mi, ku ta doño di un barko di río basta grandi, i hopi biaha ta karga i deskargá na Alemania, a yega di kontá mi kon un biaha un hoben aleman kier a tent'é bisando: "Boso país a wòrdo okupá pa e tropanan aleman den tres día di tempo!il klasa di soldá e hulandesnan ei tábata?" "Hende pasífiko," mi sobrino dí, "ku no por a komprondé ku tabatin hende asina barbáriko i sin konsenshi, ku nan kier a ataká nan." I el a agrágá: "/ e henden'ei sin konsenshi tábata asina bobo, ku nan a aseptá ku un fèrfdó di kasfrakasá di Oustria a bin ta goberná nan." "Mi no mag lei bo." e hoben aleman a bis'é.

     Día ku m'a pèrdè mi bista por kompleto, na aña 1972, m'a kompartí un kamber den hospital na Amsterdam ku un kunukero aleman - di Bavaria (Beieren) - ku nan a manda Amsterdam pa un operashonb, pa via ku el a haña un aksidente den su kunuku. Te ainda mi ta mir'é pará aya den e kamber di hospital, ku un kara hopi tristu, manera pensando: 'ki mi ta hasi na e lugá aki, kaminda ningun hende ta komprondé mi?'M'a lesa su nomber i fam riba su kama, i má konklui ku e mester a bini fò'i Suisa, Oustrria of Bavaria na Alemania. Asina ku m'a puntr'é na aleman: "Wasf úr Nation sind She?" ("Ki nashonalidat mener ta?") i su kara a kambia al instante pa un sonrisa grandi, i el a bisa: "Deutscher" (Aleman).

     Ora el a yama su kasá e anochi ei, el a bis'é: "Ami ta Bavariano (Beier) i e ta yama su mes Bavariano (Beijer)." El a bisá mi ku e tábata bini di e régionan serka di Múnchen, ma ora nos relashon a bira mas amistoso, el a bisá mi: "Esei ta loke nan a konsehá mi pa bisa na Hulanda, ma den realidat mi ta biba den un pueblo mashá serka di Dachau." I el a agrágá: "ma mi tabatin no mas ku 12 aña di edat e tempo ei." Na Dachau tavatin e afamado kampo di konsentrashon, kaminda entre otro George Maduro di Korsou a muri. I ora nos a bishit'é durante nos biaha rónt di Europa na aña 2001, el a keda asina bruhá dor di bolbe mirá mi, despues di tantu aña, ku e no a logra papia aleman ofishal ma solamente su dialekto Bavariano, loke a kousa ku mi tabatin pòko problema pa komprond'ele. I ora m'a bis'é ku nos tambe tábata bai dal un bishita na e kampo di konsentrashon, el a bolbe bisa: "Ja, damais war ich 12 Jahre ait" - Si, e tempo ei mi tabatin 12 aña di edat.

     Nos lo no lubidá nunka e bishita ei na e kampo di konsentrashon ei. Tábata un eksperensha hororoso. I korda bon: no tábata trata di un kampo di eksterminashon!

     M'a nase ku myopia ekstremo, es ta: 'bijziendheid', ku ta kousá pa wowonan ku ta muchu largo, i komo konsekuensia, retinanan gerèk, ku p'én motibo ei ta débil i por los fasilmente. Esei a sosod&e acute; den mi

     Esei a sosodé ku mi wowo robes, ora mi tabatin 10 aña, na prinsipio di 1943, probabelmente pasobra mi a kai riba eis, unda nos tábata hunga slep, ke men di mei-mei di guera. E tempo ei, e método di operashon tábata eksigi ainda, ku e pasient tábata keda drumi ketu riba un horea, pa mas of menos tres siman. Awó, si bo bisa un mucha di dies aña pa hasi esei, bo por ta sigur ku lo sigui un frakaso. Sobra dje, un par di biaha e enfermeranan tábata bin drenta e sala koriendo, pa hala mi kama leu for di bentana, pasobra tabatin un bombardeo andando.

     Pa yega na e hospital ei tábata un aventura riba su mes. Nos dòkter di kas a bisa mi tata maínta ora el a bai p'e ku mi, pa bolbe bèk anochi, ora solo a baha. E ora ei, mei-mei di guera, den e konsultorío di un dòkter di kas den un pueblo chikito, el a diagnostiká desprendemento di retina i a kuminsá mòrs ku un di e telefonnan bieu di e tempo ei i di un manera of otro el a logra konektá ku e hospital pa fayonan di bista na Utrecht, ku a bis'é pa tresé mi su manisé. Kon pa hasi esei, nan no a bis'é. Doño di e garashi den nos kaya, si tábatin outo, ma ni un gota mas di gasolin. El a traha, loke e tempon'ei nan tábata yama un "houtgasgenerator" es ta: "generadó di gas di palu" na parti patras di e outo bieu ei. Por parse straño, ma e tábata traha si, i e tábata move! I el a hiba nos pa Elst, un stat chikito pasùit di Arnhem, kaminda tabatin un station di trein i aya nos a subi un trein antikuá, ku un 'locomotief grandote i impreshonante dilanti di dje, ku tábata basha vapor na grandi - e promé mashin asina ku m 'a yega di mira - ku a hiba nos Utrecht tumando un par di ora pa kubri e distansia di mas of menos shen kilometer - pasobra tábata parse ku e mester a para na kada palu kant' i e lina di trein.

     E generadónan di gas di palu tambe tábata wòrdo uzá pa alemannan e tempo ei i mi ta haña ku ta basta straño, ku nan no a desaroyá nan mas aleu despues di guera. Sin embargo, aktualmente, awó ku energía alternatibo ta birando hopi popular, kasi setenta aña despues, e idea a bolbe bèk den loke ta konosi komo "generashon di bio-gas", loke ta nifiká ku nan ta gánárá gas dor di keinta desperdisio biológiko. Aparentemente, si bo ta keinta un bari di splender di palu, e palu lo no kima, ma ta produsi gas, ku lo kima si bo ta mand'é pa e lugá unda bo ke p'e kima. I ta nèt esei loke nan ta hasiendo awendía komo fuente alternatibo, uzando desperdisio orgániko. Te asta aki, riba nos isla Aruba, un empresa komersial yamá Ecotech a firma un kontrato ku WEB, e empresa statal lokal pa awa i energía, pa suministrá bio-gas.

     Kon ku bai bini, m'a pèrdè mi bista den e wowo robes ei, mientras ku e otro tábata un asina yamá "wowo floho", ofishalmente konosi komo "ambliopia", di modo ku mi si por a mira ainda, ma mi no por a lesa mas. P'e motibo ei, despues di guera, nan a mandá mi un instituto pa siegonan, kaminda m'a siña lesa i skirbi braille, taip ku dies dede, i tur e vaknan normal di skol, inkluso idiomanan Ingles, Aleman i Franses. Tur esten, sin embargo, m'a kuminsá logra lesa tekstonan imprimi atrobe, maske mi mester a tene e tekstonan na un distansia mashá serka di mi kara. M'a konta esei un biaha na un dòkter di bista, ku tábata mantená ku bo no por a mihorrá bista den kaso di ambliopia i e di: "Senor de Beijer, no ta bo wowo ku a mihora, ma bo seso a mihorá den interpretashon di e imágennan Visual."

     Pa loke ta konserni e dòkter di kas ei den nos pueblo,m'a yega di konta bários dòkter aktual, kon e, den e sirkumstansianan sumamente difísilei, a bira un 'jack-of-all-trades' mádiko, sin pidi pago pa su intervenshonnan. Por ehempel, e primo di mi, ku m'a menshoná kaba, a haña un splender di bòm ful dor di dos dede di su man drechi, durante un bombardeo pa un oroplano aliá, riba kas di mi welanan. E ora ei, e dòkter di kas ei di nos pueblo, a amputá su dos dedenan afektá den kèlder bou di su kas, ku un buki di instrukshonnan riba su skochi.

     Durante e mesun bombardeo, mi prima di dies a˜a a haña un splender di bòm den su lomba, ku e dökter no a tribi kita, pasobra e splender tábata hera di töchi su pulmonnan. Nan a trese nan tur dos na nos kas, pasobra nan mayornan i nan ruman-muh&eaccute; mayor i un yiu-homber di bisiña a pèrdè nan bida den e bombardeo ei. Nan mama, mi tanta, tábata ruman mayor di mi mama. Mi welanan, banda di mi mama, tambe a bin djoín nos tur den nos kas. Danki Dios nan a skapa mirakulosamente ileso den e bombardeo ei, ku a tuma lugá presisamente riba nan kas. E siguiente día, mitar di e kasnan den e kaya ei - e kaya prinsipal di nos pueblo - a keda destruí, ma e día ei sin ningun daño personal, pasobra e hendenan a logra yega den e 'shelternan'na ora.

     Nos no a komprondé nunka pakiko e oroplanonan aliá tábata tira e bò,nan ei, ma e temponan ei, segun m'a komprondé, e pilotonan no tabatin ningun otro manera pa investigá ku loke nan tábata mira dor di e wenshild di nan 'cockpit' i asina tábata Kòreun risiko grandi di tuma un desishon robes. Esei tambe a pasa na Nijmegen, día 22 di februari 1944, ora un eskadron di bombardero merikano ya a pasa e siudat kaba, rumbo pa e stat aleman Kleve (por lo menos, asina nan a bisa), nèt na otro banda di frontera aleman, ora lider di e eskadron aparentemente a kere ku el a hasi un fout i a pasa e siudat di Kleve kaba, ku tábata su dul pa bombardi'é i el a disidí di bira bèk pa Nijmegen i a bombardi'é, mientras ku e senal di sirena a zona kaba pa avisá ku e situashon tábata 'safe' atrobe i tur hende a sali for di e shelternan, di modo ku tabatin hopi víktima, tantu m&mograverto ku heridá i sentro di e siudat a keda kompletamente destruí. E tempo ei, klaro ku nos no tábata sa ku e eskadron ei tábata sisti di oroplanonan merikano. Nos a siña esei despues den nos lès di historia di guera.

     Un kos straño, of por lo menos kurioso, den e relato aki, sin embargo, ta, ku mientras ku nan tábata bula riba Nijmegen, e pilotonan mester por a mira e siudat di Kleve,pasobra e ta nètna otro banda di frontera i sobra dje, Kleve no ta situá banda di un rio, manera Nijmegen. P'e motibo ei, nan a sugeri, ku e eskadron tábata na kaminda pa Emmerich, mas panort pariba, ku di berdat ta situá banda pasùit di un río (es ta: Rijn), meskos ku Nijmegen na banda sùit di río Waal.

     M'a pèrdè bista den mi wowo drechi nèt despues ku m'a hasi 40 aña di edat; Nan a opárá mi pa katarata, loke normalmente ta un intervenshon sin kasi nada di risiko, ma den mi kaso m'a haña un infekshon serio, di modo ku mi wowo a keda kompletamente sushi paden I mi mester a keda drumi ketu, pasobra nan tabatin miedo ku e retina por a los. Awèl, e desprendimento di retina ei a bin na final, ora ya kaba mi por a mira mihè ku hopi tempo promé i e tábata kompleto. Nan a oper'é, bisando: "Bo no tin nada di pèrdè tòg." Awèl, asin a kos a bai. M'a pèrd è e wowo ei kompletamente, pasobra el a desaroyá gloukoma agudo, di modo ku nan mester a kit'é.

     E tempo ei, mi tábata traha pa un korant nashonal - De Volkskrant - den departamento di dokumentashon éditorial. Mi tábata skirbi hopi pa e korant ei i pa otro revistanan. Den un entrevista ekstenso ku un eksperto labroral, el a bisa: "Mira, mener de Beijer. Un hende di kuarenta aña, ku ta pèrdè su trabou, tin un chèns chikito pa haha un empleo nobo riba su mesun nivel di ekspertisio. Un persona siego di kuarenta aña tin un chèns di mas of menos sinko por ciento pa haha otro empleo riba su nivel di konosimento i eksperensia." P'e motibo ei, mi kasá Arubiano, Marina Mathilda ku mi a tuma e desishon di muf pa Aruba, mientras ku mi tábata mantená mi pago pa inkapasidat laboral i enbolbá nos mes den desaroyo di servisionan pa hende siego i hende ku bista limitá riba e isla,ku a bira FAVI, mientras ku mi kasá kasi mesora a bolbe drenta komo maestro den ensenansa primario. Apenas ku nos a yega, Frèpre Edwin (Jan Jonkers), kabesante di Sint Jozef school na Santa Cruz a bin prásentá su mes pa supliká mi kas á pa bin traha na su skol mesora.

     Manera m'a bisa kaba, despues ku e tropanan aliá a baha na Nijmegen i Arnhem, día 17 di september di aña 1944, durante loke nan tábaata yama "operation Market Garden" - manera nos a siña despues di guera - nos pueblo a bira lina di trente, kaminda e fuersanan Aleman i aliá a kuminsá tira granada pa otro, kasi sin interupshon. Nos a siña rekonosá, te asta anos, muchanan chikito, ki ora un granada lo tábata bai kai aserka of mas aleu. Tábata dependá di e zonido di flùitmento ku nan tábata hasi ora nan tábata aserkando. Un flùitmento di tono haltu tábata ke men "leu"i di tono abou "serka", i esei tábata nifiká pa nos kai abou, plat riba tera! Nos a traha un burako hundu i grandi den kurá patras di nos kas, tapá ku balkinan diki i un monton di tera riba nan, pa sirbi komo "shelter " pa dos famía huntu i te asta soldánan aleman a yuda nos ku nan konseho, ma eseinan, naturalmente, no tábata soldá di quot;Waffe SS", ma soldá di 'Wehrmacht', ke men: militarnan obligatorío of, manera nan sa bisa na Hulandes: "dienstplichtig". Un militar hulandes di Waffe SS un día a bin drenta kurá di nos kas i a pidi mi mama pa fi'é su bisikleta. El a keda di tres'é bèk atardi, asina el a bisa. Te awe! Otro soldá aleman di 'Wehrmacht', un día a bin nos kas i a pidi pa e por a laba su kurpa por fabor, pasobra e no por a laba di modo drechi durante dos siman. E di ku e no tábata komprondé e guera; "Ich musz She totschieszen undSie müssen mr totschieszen und was haben wir zusammen?"- (Ami tin ku tira boso mata i boso tin ku tira mi mata, i kiko nos tin ku otro?) e dí. No tábata trata di un persona yong, manera mi ta kòrdé, hablando danki na mi mama pa su amabilidat, ora el a bai bèk pa su puesto.

     Banda di fin di aña 1943 i den e promé parti di aña 1944, di vez enn cuando kolumnanan di soldá aleman tábata sa pasa marchando i kantando: "Und wir fahren, und wir fahren, und wir fahren ab nach Engeland, Engeland!" - (I nos ta bai navegá pa Inglatera) - i anos, muchanan e ora ei tábata grita: "plons! plons!" - (djumblum! Djumblum!) i despues nos tábata kanta: "Wir versaufen, wir versaufen, wir vewrsaufen vlak voor Engeland, Engeland!"- (nos ta hoga, nèt promé ku Inglatera) - mitar na aleman i mitar na hulandes.

     Nos mester a siña kanshonnan aleman na skol i nos tábata obligá di mira pelikulanan di propaganda, ku no tábata hasi ningun impreshon riba nos. Al contrario! Nos tábata sa kanta duru-duru kanshonan di protesta, manera esun ku ta sigui, dirigi speshalmente riba kolaboradonan, es ta: hulandesnan ku tábata sosttené e régimen aleman. E partido Nazi hulandes tábata yama NSB i nan korant tábata "Volk en Vaderland". E kanshon tábata:

     Op de hoek van de straat, staat 'n farizeeër,

     't is geen man, 't is geen vrouw, 't is 'n NSBër.

     Op de hoek van de straat, staat hij daar te venten;

     hij verkoopt zijn vaderland, voor vijflosse centen!

     Pa esnan ku no sa Hulandes:

     Na skina di kaya, ta para un fariseo.

     No ta ni homber, ni muh&eaccute; ta un NSB-o.

     Na skina di kaya, aya e ta grita, e ta bende su patria pa dos plaka pretu.

     Otro kanshon faborito di anos, muchanan, tábata:

A B CD E FG Weg met de moffen en de NSB

Mi no ta kordakon e tábata sigui.

     Atrobe, pa esnan ku no sa hulandes:

A B C D E F G kòre ku aleman i NSB!

Un di nos bisiñanan di otro banda di kaya tábata miembro di partido NSB. Asina leu ku mi sa, e úniko di nan den e pueblo hentá. Te asta el a sirbi boluntariamente den ehérsito aleman i a tuma parti den e bataya di trente pariba, na Rusia. Un día, ku mi ta korda, el a bin na nos kas pa keha na mi tata ku nos a tenta su yiu-homber , bisando ku e tábata yiu di un traidó. Anto, mi tata a tuma un risiko grandi, kontestando:"/ kiko abo ta bisa anto kiko e ta?" Klaro ku esei tábata un kos mashá peligroso pa bisa, ma danki Dios el a skapa kuné. Probabelmente tabatin mas kolaboradó den nos pueblo, ma anos, muchanan, no tábata konosénan, te ku despues di guera.

     Día pa día mas kos ku a pasa durante e añanan di guera sa bolbe brota den mi memoria. Un di e kosnan ei ku mi ta korda pa nos den sierto sentido tábata mashá prèt;. E alemannan a lanta un instalashon di lusnan fuèrte, no muchu leu for di nos kas riba dijk, ku nan tábata uza pa purba kapturá oroplanonan di e forsanan aliá den anochi, pa nan por a tira riba nan. Riba un anochi, nnan a kói un oroplano den un di nan lusnan, ma e piloto a bin abou stret den e rayo di lus, ku su mitrayadó skupiendo balanan. Anos, na nos kas, por a tende e komandante aleman ku tábata grita pa loko: "Licht aus! Licht aus!" - (Paga lus!).

     Otro kos, ku no tábata nada grasioso, tábata ku e alemannan aparentemente tambe tábata kere ku despues ku e tropanan aliá a baha na Nijmegen, nan lo tábata bai okupá nos pueblonan pronto tambe. P'e motibo ei, nan a disidí di bula e toren di nos misa na kuminsamento di nos kaya, ku tabatin un haltura di mas of menos 30 meter, pa preveni ku e militarnan aliá por a uz'é komo toren di vigilansia. Anto, nan a pone eksplosibonan pisá den dje i a bul'é di tal modo ku el a kai stret den e misa, pasobra no tabatin lugá na banda. Klaro ku tábata trata aki di un akto ridíkulo, pasobra te asta ku e tropanan aliá lo a konkistá nos pueblo, sigur-sigur, nan lo no tábata interesá den un toren di vigilansia, ku lo no tábata sirbi nan pa nada tòg.

     Anos, muchanan, naturalmente no tabatin ningun idea di loke tábata pasando ku e hudíonan i mi ta duda ku mayoria di hende adulto tábata komprondé muchu kos tokante di e asunto ei. Ounke mi ta korda ku tabatin un famía ku tabatin dos mucha-muhé chikito straño den kas, di modo ku mi ta suponé ku tábata trata di muchanan hudío skondí aya. Kon ku bai bini, manera nos a haña sa despues di guera, hopi mucha hudío a keda salbá di e kambernan di gas aleman, dor di skonde nan ku famianan no hudío, ku tábata laga pasa nan manera nan mes yiu. Hopi di nan te asta a keda konverti pa katolisismo of protestant reformá.

     Klaro ku anos, muchanan no tábata sa nada tampòko di resistensia kontra e alemannan. tur esei, nos a siña ora guera a kaba, manera tambe tokante di hopi héruenan manera Boy Ecuri di Aruba ku a wòrdo fusilá pa e alemannan, generalmente pasobra otro hende a traishoná nan.

     Despues di guera nos a haña tende e famoso dicho aleman: "Wir haben es Night gewust." - (Nos no tábata sa.). I pa mayoria di nan, esei probabelmente tábata sinsero, ounke nos meste rrekonosétambe, ku Hitler a yega na poder di un manera mas of menos demokrátiko i ku oposishon kontra dje i su partido Nazi tábata basta limitá na Alemania. I un kos mas: riba e gespnan di e fahanan di e soldánan aleman, tábata tin e inskripshon: "Gott mit uns" - (Dios ku nos).

     Un par di siman despues ku e parachutistanan aliá a baha na Nijmegen, e alemannan, ku naturalmente tábata sa mas ku nos, a desidí di evakuá nos i a bin kasi mei anochi pakòre ku nos for di nos kas i shelternan, bisando ku nos mester a sali bai i krusa río Rijn. Tábatin hende ku tábata hasi esei sí, ma otro hende, manera nos mes, no kier a sali, den speransa ku e forsanan aliá lo tábata bai libra nos pronto. P'esei, nos a sali for di nos kas i shelter i a bai mardugá chikito pa un fábrika di klinker banda di río Waal, unda nos a pasa sobrá di anochi den un di e fòrnonan bashf, resando, huntu ku hopi otro hende. Manera un dicho hulandesta bisa: "Nood leert bidden."- nesesidat ta siña resa.

     Manera m'a konta kaba, e díanan ei nos tabatin nos welanan di banda di nos mama ku nos i nos dos primonan heridá. Asina leu ku mi ta korda, tábata solamente mi tata i welo ku a atendé deramento di mi tanta i omo i nan yiu-muh&eaccute; mayor, sin ningun servisio religioso. Mi ta korda ku m'a tende e storia di un tata den nos pueblo ku mester a dera su mes dos yiu-muh&eaccute;nan chikito den su mes kurá.

     Su manisá nos a bai na e barko di río di mi tata, ku tábata mará no muchu leu for di e fábrika di klinker, pasobra su rumandi kende su barko tábata mará banda di esun di mi tata, huntu ku mi tata kier a purba drif den anochi den direkshon di Nijmegen. Sin embargo e plan ei a frakasá debí na muchu hopi klaridat di luna i asina, e siguiente día, e alemannan a bolbekKòreku nos, bisando ku tábata muchu peligroso pa nos keda aya, loke, evidentemente tábata berdat tambe. Di pursi, e espasio den kua nos tábata keda tábata hmuchu chikito i un granada riba dak di e kabina, lo a mata nos tur. E militarnan aleman a ordená nos atrobe pa bai krusa río Rijn, Un bes mas, nos no a kumpli ku e òrden ei i a desidí - ke men dí, nos mayornan i welanan a desidí - di bai kana basta leu pa bai skonde den otrro barko di otro omo di mi, otro ruman di mi tata, (e famía tábata "binnenvaartschippers" (navegante di río) for di prinsipio di siglo 19 kaba). Pa straño ku por parse, wer tábata fantástiko pa e tempo di aña, pa un kaminata asina, riba un kaminda di santu banda di e r ío. I mi ta korda kla-kla, ku na kaminda, te asta mi wela mester a hùrk ku yudansa di mi welo pa uriná, aya, mei-mei di kaminda. Si un hende lo a bis'é un par di siman promé ku l'e tábata bai hasi un kos asina, l'el a duna e persona ei sigur-sigur un labá i striká.

     Otro kos kurioso ku mi ta korda di e día ei, tábata un shon riba un karosa ku kabai su dilanti kargá ku tur klasa di artikulonan di kas mientras ku e tábata kanta ku bos duru-duru. Mi tata i welo aparentemente tábata konos'é, pasobra nan a hari kuné i a puntr'é na modo di chansa unda e tábata kere ku e tábata bayendo. "Pa krusa río Rijn!" e dí. "Manera e 'moffen'"a òrdená!" E konklushon di mi mayor i welanan tábata ku ei a hòrta tur kos, kabai i karosa inkluí.

     Anochi tempran, algun hende ku kurashi, manera mi tata, tábata sa sali pa bai den e kamponan di yerba, pa wak si tábatin baka ku nan por a chika. Un di e anochinan ei, ei a bolbe, kontando ku ei a topa ku un par di soldá aleman ku a desertá i tábata skondí, wardando pa e fórsanan aliá bini liberá e área pa entregá nan mes. Mi tin miedo ku nan mester a warda hopi tempo ainda

     U n primo di mi tata, ku tábata un landadó ekselente, un anochi a kita su pana, a hunta su kurpa ku grasa i a bula den e río. Despues ku nos a wòrdo liberá i a bolbe kas bèk, nos a haña sa ku ei a logra yega e área liberá di e tropanan aliá tambe e anochi ei.

     Un par di día despues, e alemannan a desidí di tuma medidanan mas drástiko pa Kòreku nos for di e lugá ei i aòrdenaacute; nos den un fila largo, ku dos soldá na kabes, algun soldá na banda, - pa preveni ku nos por a koi un kaminda di banda ku tábata baha for di e dijk - i dos soldá na final. Promé ku esei, nan a duna nos un chèns pa köí e pòko poseshonnan ku nos tábata tin ainda, riba bisikleta i karetío i mi ta korda ku mi tata tábata muchu slo den wowo di un ofishal di Waffe SS, ku a menas'é di tir'é "durch die Knochen" - dor di su patanan - loke a kousa ku mi mama a rabia mashá i pasobra e tábata sa papia aleman perfektamente (el a nase na Alemania for di mayornan hulandes i a bai skol aya durante ocho aña) i a duna e ofishal aleman ei su lavèt, di modo ku e ofishal aparentemente a haña e impreshon ku mi mama tábata aleman tambe i a baha su skopèt mesora. E siguiente día, manera nos a haña sa despues, e alemannan a deskubrí ku un grupo chikito di hende a keda skonde riba e mesun barko unda nos tábata ta i un ofishal di SS a menasá pa tira un granada di man den e hold kaminda nan tábata ta skondí. Pa preveni esei, un primo yong di mi tata a sali pa pusha un pasarela largo di e barko pa tera. Mesora ku el a hasi esei, e ofishal di SS aleman a tira un bala den su kabes.

     Mi no ta ful sigur mas, ma mi ta kere ku nos a kana mas of menos dies kilometer riba dijk - ku tabatin un bon kaminda di asfalt manera kasi tur dijk na Hulanda - te yega na e punto unda e militarnan aleman tabatin un ferry militar riba río Rijn, ku kua nan a trasbordá nos pa e otro banda pa e pueblo Pannerden, kaminda nan a laga nos pa nos kuenta, mas of menos mei-anochi. Sin embargo, manera un proverbio hulandes ta bisa: "Als de nood het hoogst is, is de redding nabij." - ora emergensia ta na su punto pio, reskate ta serka. Un hende-homber hoben a bin kana den nos direkshon i a puntra: "Unda boso ta bai na e ora imposibel aki?" i el a hiba nos na su kas di kunuku kaminda mi welanan i e dos primonan heridá a haña un kama pa drumi aden. Mi mayornan i nos, naturalmente mester a drumi riba flur, ma nos tambe a haña pan ku manteka i webo i lechi!

     Ora nos a lanta fò'i soño na kas di e kunukero hoben amabel ei, el a rekogá mas pan, webo i lechi pa nos por a desayuná i siguidamente nos a kuminsá nos kaminata largo, disidí pa mi tata, pa un fábrika di klinker banda di río IJssel - otro ramo mas smal di río Rijn - di unda e tábata konosée Doño, pasobra el a suministr'é un par di biaha ku un karga di santu. Tábata un kaminata di mas of menos 30 kilometer, ma nos tábatin suèrte, pasobra a pesar ku tábata - si mi no ta herá - kuminsamento di oktober, otro biaha tempo tábata hopi bon mes, ku hopi solo; Mi ta korda esei bonbon. I no lubidá, nos tábata ofresé un bista basta stravegante, ku un pareha grandi - mi welanan di 80 aña di edat ; mi tata i mama, tur dos 44 aña bieu; mi mama, kargando mi ruman mas chikito di dos aña bieu; mi primo di 17 aña, ku su man drechi den ferbant diki pasobra el a pèrdè dos dede i ku tábata tin doló kontinuamente; mi prima di 10 aña, ku un splender di bòm den su lomba, ku tambe tábata dun'é doló kontinuo; i mi rumannan, esun di mas bieu 13 aña. Tur huntu, inkluyendo mi ruman mas chikito ku a hasi na luna di yüni nèt dos aña, nos tábata sinko mucha-homber i tres mucha-muh&eaccute; chikito. I mi tata bayendo padilanti ku su karetíoku e pòko pertenensianan ku el a logra rekogá.

     Tábata basta tempran ainda, ku na un krusada nos a topa ku mi welo di banda di mi tata, i un omo - ruman di mi tata - ku a bisa ku nan tábata bai Zevenaar, un stat chikito pariba di unda nos tábata ta, unda mi otro wela - mama di mi tata - a wàrdo hibá un par di siman mas promé pa un hospital. (Kisas ta vale la pena pa menshoná, ku e tambe durante e delaster añanan di su bida tábata siego.) Mi tata a disidí di bai ku nan, i nos a warda aya te ku el a bolbe bèk. El a yega mas of menos un ora despues ku lágrima den su wowo, kontando nos ku su mama a muri i ku e tábata derá kaba.

     nos a sigui kana i a haña set i hamber i mas of menos mei-mei di atardi nos a pasa un puesto aleman i mi tata a disidí di bai wak si nan por a duna nos algo di kome i bebe. I ... bo por kere of lag'i kere, nan a hasi'é tambe. Pasobra mi ta korda kon mi tata a bolbe bèk ku su brasanan yen di pan i soseishi.

     Lat e atardi ei nos a yega na río Ijssel i un hende-homber simpátiko ku un boto di rema a hiba nos na otro banda remando di un banda pa otro por lo menos tres biaha, si mi ta korda bon. Den e pueblo di e fábrika di klinker nan no tabatain ningun lugá pa nos keda, n'e momento ei, asina ku nan a hiba nos den un di e fòrnonan di e fábrika, ku no tábata den uzo i a tapa flur ku un kantidat di paha i algun hende amabel a trese nos un wea grandi di 'stampot' di kol korá i, ounke mi nunka tábata muchu amante di kol korá, mi ta korda ku el a smak absolutamente delisioso, ku te día di awe mi no a lubid'é. E loko di e pueblo tambe a pasa pa hari nos, ma nos tur tábata hopi kansá e lihé-lihé a pega soño aya den e paha ei.

      Su manisá, nan a saka tur kos for di un mangasina chikito pa e por a sirbi nos pa keda aden, ma e tábata muchu chikito, i banda di merdia, dos mener hóben, yiunan di e Doño di otro kompleho di fábrika di klinker aya banda, a bin bishitá nos bisando ku nan por a ofresé un lugá mas grandi pa nos keda aden, asina ku nos a bai ku nan i en berdat nos a haña un mangasina basta grandi, dividi den dos parti, un parti ku tábata sirbi nos pa dormitorío - pa tur dieskuater di nos huntu! - i e parti padilanti komo sala, komedó i kushina, tur huntu, ku pòko muebelnan bieu i un 'kachel' chikito mashá antikuá pa keda kayente paden i pa kushiná riba dje. Afortunadamente, e fábrikanan no tábata traha, ma tabatin kantidat di karbon brùin aya i nan a duna nos permit pa uz'é.

     Nos mayor i welanan, ku yudansa di algun aima benávolo di e poblashon lokal di e bisindarío di e f ábrikanan, a rondeá un kantidat di banki largo abou pa kubri flur di e parti di nos mangasina ku a sirbi nos komo dormitorio,i siguientemente nan a kubri nan ku paha, ku a keda tapá na su turno ku lona di un sorto of otro. Mi no ta korda di unda nan a saka tur e kosn'ei, huntu ku deklu i kushinchinan, ma asina nos a haña unb lugá basta konfortabel pa nos drumi, nos tur huntu

     Ta klaro ku no tabatin ningun b&ntiulde;o den e mangasina ei i awó ku mi ta pensa riba dje, mi no ta korda si e WC improvisá pafó tábata t'ei for di ora nos a yega, of ku nan a trah'é pa nos. Mi ke sa ku ta e delaster, pasobra tábata un kos mashá simpel trahá riba tapadera di un berpùt. Naturalmente, durante winter ku a sigui no tábata nada plasentero pa uz'e'. P'esei, mi ta kere ku anos, muchanan, tábata permiti pa uza un we'i pishi improvisá paden, den nos "hogar". Pa awa, tabatin un simpel p&ogrve;mp di man pafó, den tera, ku kua nos por a yena hemchinan pa hiba paden, pa laba i kushiná. Na parti pariba di Hulanda partikularmente, si bo ta hinka un tubo den tera, bam bisa tres pa kuater meter hundu, i bo ta konektá un p&ogrve;mp di man riba dje, bo ta haña awa fresku i limpi. Nos a biba aya ocho luna largo, a sobrebibi e kalamidat di hamber di e winter ei, pasobra e skarsedat di kuminda tábata total, i nos no por a bai kas bèk despues di nos liberashon, pasobra e lugá tábata pestá di mina di tera.

     Papiando di guera, mi ta puntra mi mes hopi biaha, si e hende ku ta dediká nan mes na muchanan den guera, tin komprenshon berdadero nan mes, di kon muchanan ta reakshoná riba tipo di eksperenshanan asina. Ami no ta, ni tábata ta troumatisá dor di mi eksperenshanan durante e di dos guera mundial. Muchanan ta aseptá e eventonan mas stravegante komo normal. Mi ta korda kon mi tábata hunga pafó, riba e tereno ei di e fábrika di klinker, ora un oroplano di guera aliá a bin abou i a tira ku su mitrayadónan. No puntrá mi pakiko, ma un di e balanan a dal kontra un ril di e lina di trein di karga di e fábrika, mashá serka di mi, i p'esei m'a kana bai p'e pa piki e bala ei. M'a lag'é kai bèk mesora, pasobra e tábata mashá kayente.

     Na otro okashon, mi tata a fia un bisikleta pa hibá mi dòkter di bista, na Velp, un suburbio di Arnhem, i ora nos tábata na kaminda, un trùk yen di soldá aleman a pasa nos i un oroplano aliá a bin abou, ku su mitrayadónan ful habri, di modo ku e balanan literalmente a bula ront di nos, i mi tata kier a bula for di e bais, tirando su pia gdrechi patras di tal modo ku el a hera tirá mi for di e bais. Kon ku bai bini, nos a bula abou den un roi kant'i kaminda i ora e trùk i e oroplano a pasa, nos a bolbe subi e bisikleta pa yega nos destinashon. Riba kaminda bèk, nos a haña un flètaira i a bai pa un reparado di bisikleta, ku nos a pasa. Ma e Doño no kier a drecha e taira, si nos no por a tres 'é un kilo di batata. "Male lo mi tabatin nan, pa mi mes famía." mi tata a bis'é. E shon a komprondé nos situashon i a pesar di loke el a bisa na promé instansia, el a drecha e taira tòg.

     E tempon'ei mi mama huntu ku mi ruman mayor tábata bai na e otro banda di e río Ijssel (e río no ta muchu hanchu ei banda) pa bai pidi kuminda na e kunukeronan di e régionan ei, un régionan primordialmente agrario. Semper tabatin un hende ku un boto di rema pa hiba nan na e otro banda i bèk. Hopi biaha el a bin bèk ku mashá pòko of te asta nada. Ma, un biaha, ku mi ta korda, el a subi tereno di un kunukero, unda un grupo di militarnan aleman a kaba di mata un porko . Mi mama a puntra nan den su aleman perfekto , si e por a haña poko karni, loke a kousa ku un di e alemannan a kèi su 'bayonet' - un sorto di machete ku nan por a pone riba nan skopètnan - i a korta un pida grandi di karni for di e porko matá i a pas'é p'e.

     Tabatin dianan tambe, ku algun kunukero generoso tábata duna mi mama bòternan di lechi, batata i otro kosnan balioso pa nos, pa nos tin algo drechi pa kome atrobe. Un kos kurioso ku mi ta korda ta ku nos tábata hasi turno sakudiendo un bòter di lechi, pa basta ora largo, te ku nos tábata haña un pida chikito di manteka den dje, pa mi mama uz'é den su kushinamento. Despues, anos, muchanan mester a bebe e kalmèki ku tábata keda , ku ami, personalmente, no tábata nada amante di dje, pa su sabour zür.

     E 'winter' ei, mi tata a bira ladron pa e promé i úniko biaha den su bida. El a bai aserká un kunukero ku un kunuku yen-yen di diferente sorto di kol, pdidiendo pa kumpra algun. Ma e kunukero a nenga di bende, bisando ku plaka no tabatin balor mas. E ora ei, e anochi ei, ora skuridat a kai,mi tata a bai bèk e kunuku ei pa korta poko di e gran kantidat di kolnan. N'e momento ei, otro hende-homber a bin ta aserk'é pidiendo mi tata pa bend'é áalgun di e kolnan. "Bo por korta loke bo ke. ", mi tata a bis'é. E ora ei, e mener ei a dun'é un sigá. No puntrá mi di unda Lel a han&aposs;é, pasobra mi welo, ku tábata adikto na su pipa, no por a haña tabako mas i p'e motibo ei, tábata hinka blachi seko di palo di eik den su pipa, kousando un holò stinki hororoso. P'esei, mi tata, ku tambe tábata gusta sigá, a duna mi welo e sigá ku el a haña, i el a garn'á den su pipa mesora.

     Un siman despues, henter e kunuku yen di kol tábata bou di awa, pasobra e río a subi te na un nivel ku e awa a inundi tur e terenonan mas abou - un kos ku sa pasa hopi biaha den tempo di winter - i nos a bira habitantenan di un isla.

     E habitantenan di e pueblonan ront di e fábrikanan tábata yama nos "refugiado", ma nos no tábata gusta mes ku nan tábata yama nos asina, pasobra nos no a hui, ma e alemannan a Kòreku nos, asina nos tábata haña. E alemannan tábata yam'é "evakuashon", ma manera m'a bisa kaba, nos no tábata kier wòrdoevakuá. Mi por komprondé bon-bon, pakiko hende bibá den áreanan peligroso, hopi biaha ta nenga di sali, mientras ku tur hende "sensato" ta haña ku nan mester hui.

     Un día, mi ta korda - of , por lo menos mi ta korda mi mayornan konta e storia - tabatin un "razzia" den kua e alemannan tábata rondeá hombernan kapabel pa hasi un sorto di labor forsá pa nan. P'e no wòrdokapturá, mi tata a skonde den un sero di yerba seku. despues di un ora asina, el a suponé ku l'e por tábata sano y salvo, i a sali for di e sero di yerba, aparesiendo dilanti di wowo di un militar aleman. E militar a pidi'é pa su identifikashon, ku e no tabatinb kuné, asina ku el a splika unda e tábata biba, habrakando aleman na su manera, i por fin, e soldá a sklama: "Ah! bei die Deutsche Frau!' - ku e senora aleman! "meine Frau" - mi kasá, - mi tata a bisa i e por a bai unda e tábata ke. E aleman ei, di berdat, tábata den nos bibienda-mangasina, pa chèk, i a keda pa basta ratu pa papia ku mi mama, keriendo ku e tábata aleman tambe. No lubidá ku e militarnan ei no tabatin kasi ningun kontakto ku hende-muh&eaccute; aleman, pasobra e tempo ei, hende-muh&eaccute; no tábata integrá ainda den e forsanan armá.

     Tambe tabatin un dòkter aya, ku tábata evakuá meskos ku nos, ma e no tabatin nada pa yuda hende. Ora un mama a bin konsult'é ku su yiu-muh&eaccute;, i el a diagnostisá e problema di e mucha-muhé komo anémia (es ta sanguer abou), el a konsehá e mama pa buska batata, laba nan, kaska nan i duna e mucha e kaskanan kurú pa kome. (E dianan ei ainda bo por a haña batata.) Mi mes ruman-muh&eaccute; mas chikito a kibra su pols i e dòkter a uza pida palu chuikito pa pon'é stret trobe.

     E pasku di nasimento di e aña ei, tábata uno ku nos lo no lubidá lihé. E prom á pasku sin misa, sin pastor, sin nada mes pa duna e dianan un pòko ambiente di fiesta. A kontrali! Nos tábata mei-mei di e winter di hamber di 1944 na Hulanda, mas tantu den e parti pabou di e país, ront di e statnan grandi manera Amsterdam, ma hopi hende na Hulanda no tábatasa mes, ku anos, den e parti pariba di e país, tambe tábata sufri hamber. Un kos kurioso ku mi ta korda tábata riba día sinko of seis di desember, día di Sinterklaas. Mi tábata pafó, banda di e awa ku tábata kubri e parti mayor di e tereno ei, ora un garoshi ku kabai dilanti di dje, tábata bin ful spit den mi direkshon, ku Sinterklaas na rienda i "zwarte Piet" banda di dje, ku a tira un saku di papel pa mi, ku un "boterham" den dje. Ta klaro ku m'a koh'é mesora i a kòre bai kas kuné, unda mi mama, - ku, e dianan ei tambe ya kaba tábata hopi flaku - a duna e parti mas grandi na mi primo di 17 aña, ku a kuminsá hap ora el a mir'é. Mi mama a suponé ku lo tábata e dos yiu-hombernan di e Doño di e fábrikanan. Yiu-muh&eaccute; di e famía ei, Elfie, tábata aserká mi ku afekshon spesial, probabelmente pa via di mi handicap Visual. El a hibá mi kas bários biaha pa yudá mi traha un pesebre di karton pa pasku, pa pone den nos kas-mangasina. Ora por fin nos por a bai kas bèk, despues di nos liberashon, el a rágalá mi un pintura ku e mes a traha, yamá "Kaída di Pompei".

     No obstante, un grupo chikito di hende a instalá un mangasina chikito pa sirbi komo misa, i sin pastor nos si tábata kanta i resa, nos kantikanan di pasku, rogando tur e santunan den shelu pa hasi purá ku nos liberashon. Dos senorita yong a tuma komo tarea pa duna nos, muchanan, lès di katezashi katòliko, i pasobra mi no por a lesa, mi ruman-homber mayor (un aña so!) mester a lesa e kontestanan pa mi, pa mi siña nan fö'i memoria. I esei mi a hasi! I e senoritanan a gabá mi pasobra mi tábata asina bon dkontestando nan preguntanan. Dios librá mi ku nan lo a blo awendia, pa hasi e preguntanan un biaha mas, pasobra mi tin miedo ku lo mi no tábata sa mas ku e promé dos di nan.

     Kuminsamento di 1945, Tanta Kaat - manera nos tábata yama un senora grandi kaba, ku tábata move den e pueblo den un rolstul antikuá - ku tábata klara-bidente, manera e mes a proklamá - a pronostiká ku nos lo a wòrdoliberá día 18 di april. Promé ku esei, sin embargo, asina el a bisa, nos lo tábata bai mira hopi kaera strana. El a bisa, ku e maínta di día 18 di april, nos lo no tábata bai tende nada otro ku hende resando. El a agrágá ku mas lat e día ei, angelnan lo bai aparesá tokando trompeta. Finalmente, sin embargo, e angelnan no a blo! Podesé el a suponé ku e soldánan aliá tábata angel, ma kon ku bai bini, nan no a toka trompeta. E karanan straño en efekto a pasa durante un siman asina, konsistiendo di hombernan di Mongolia kondená na labor forsá pa e alemannan, ku nan a hiba pa otro banda di e rio, pa sigui marcha pa otro lugá.

     El a konta nos, ku ora e tábata na skol komo mucha ainda, el a bisa otro mucha-muh&eaccute; un día: "Manan lo bo muri." i e mucha a haña un aksidente e siguiente día, i el a muri di bèrde mes. E ora ei, su tata a rabia mashá kuné, a dun'é un sota riba su chanchan i a bis'é ku e no tábata mag bisa kosnan asina na ningun hende, nunka mas, ounke e tábata sa ku tábata berdat.

     Mas of menos den luna di februari of kisas banda di fin di e luna ei, e awa riba e terenonan inundi a baha bastante, asina ku nos por a yega otro lugánan trobe pa via di e kamindanan i esei tambe tábata nifiká ku nos pio periodo di hamber a kaba tambe, maske loke nos por a haña pa kome no tábata ni hopi ni muchu bon.

     Tábata mas of menos kuminsamento di aprel, ku e "Tommynan" - manera nos t ábatakere ketu bai - a yega na otro banda di e rio, i a kuminsá tira granada "mortier" pa nos banda. P'e motibo ei, otro biaha nos mester a skonde den e fòrnonan bashi di e fábrikanan, ku nan murayanan di mas ku un meter diki. Un atardi lat, ora e Tommynan a stop ku nan tiramento, militarnan aleman a bin pa advertí nos, ku lo tábata mihó pa nos bai pa otro pueblo e anochi ei, pasobra nan komandante a disidí di bula e chimineanan haltisimo di e fábrikanan. Ma menos ku mei ora despues, ora nos tábata nèt kla pa sali bai, dos di nan a bin bèk pa konta nos - es ta: mi mama, di kende nan tábata kere ku e tábata aleman - ku nos por a keda tòg, pasobra e komandante a kambia su desishon pa ehekutá su plan original. P'esei, mi tata i mi welo a pasa bisa tur hende pa keda trankilo unda nan tábata ta.

     I, manera m'a bisa kaba, Tanta Kaat a pronostiká ku e maínta di día 18 di aprel, lo bo tábata tende solamente hende ku tábata resa. Esei tábata mas of menos eksaktamente loke a pasa di bèrde mes. E atardi di día 17, e alemannan a ordoná nos pa paketá nos poseshonnan i sali for di e lugá, ma un par di hende-homber a bin pasa pa tur hende, bisando pa keda unda nos tábata ta, pasobra e alemannan tábata rekogiendo nan kosnan pa sali nan mes. I asina, su manisá mardugá den e fòrnonan ei di e fábrika, yen di purga, pieu, i tur klasa di otro bichi, bo no tábata tende nada otro ku hende resando, mas tantu hende katóliko, asina ku nan tábata resa nan rosario na bós haltu. Banda di nueb' or, algun homber ku kurashi a sali afó i a bin bèk pa konta nos ku e alemannan a bai i nan a kói un boto di rema pa krusa e río pa tambe informá e "Tommynan". Mi no sa si nan tábata ingles, merikano of kanades, ma nos hombernan ku kurashi tábata nèt na ora pa preveni ku nan lo a bolbe kuminsá tira granada pa nos banda.

      Danki Dios, e alemannan no a kita e wayanan ku borchi rront di e terenonan unda nan a pone mina. Antò despues di un siman si mi ta kordabon, algun hende-homber ku kurashi a produsi palonan largo,ku klabo largo na punta, i a drenta e terenonan indiká pa e alemannan unda e minanan tábata poni, stakando e punta di nan palu skeins den tera pa haña nan i saka nan. Tábata trata di mina mashá simpel, trahá di kahanan chikito di palu, ku un burako rondó den e banda di dilanti, den kua nan tábata hinka e detonadò pa drenta den un blöki di eksplosibo. E tapadera tabatin un apertura den dje, ku tábata pasa riba e halanan di e detonadò. Ora nan tábata sera e tapadera, e bandanan di e apertura tábata keda riba e halanan. Si un hende tábata pisa riba un di nan, e pènchi di e halanan tábata sali for di e detonadó i e mina tábata eksplotá.

     Sin embargo, promá ku e buskadónan di mina a drenta e tereno pa hasi nan trabou, un kunukero kabesura kier a bai wak kon su kunuku a sobrebibi e inundashon di winter. E no a yega ni dies meter leu, ku e tábata drumi den tera gritando pa loko i despues di un ratu un par di hende a bin ku un kabuya ku nan a tira p'e i a hal'é bèk, pa unda e dòkter, ku tambe a yega despues di un ratu a konklui ku su pia drechi tábata perdi.

     M'a kaba mi relato anterior ku nos liberashon basta prosaiko. Ma esei no tábata ke men ku nos por a bai kas bèk. Tábata tarda por lo menos algun siman ku mi tata a haña permit pa bai wak kon e situashon tábata ta. I esei, naturalmente, tambe a tuma un par di día, pasobra e no tabatin otro modo di biaha mas ku su dos pia. Ora el a bolbe, el a konta nos ku nos kas tábatin hopi daño, i nos no tabtin permit ainda pa bai bèk, pasobra e outoridat provishonal tábata purba kita e gran kantidat di mina di tera. I aparentemente no tábata trata di mina simpel, ku nos tábata konoséden nos régionan di evawkuashon.

     Tur estèn, e alemannan ainda tábata sigui uza algun di nan armanan loko eksperimental, manera e V2, predesisor di e misilnan "cruise" moderno. Solamente, nan no por a dirigi nan pa un destinashon spesifiko, asina ku ora nos tábata tende un di nan biniendo, nos tábata warda ansioso pa tende ki ora e motornan tábata stop. N'e momento ei nan lo tábata kai abou. Un di nan a kai algun kilometer di unda nos tábata biba, ma e no a hasi mas daño ku un burako grandi den un kunuku. E misilnan VI - predesesornan di e misilnan balistiko moderno - en efekto tábata yega Inglatera, ma dor ku nan tabatin poko of ningun mekanismo pa dirigi nan pa un lugá spesifiko, mayoria di nan no a hasi muchu daño tampòko. I manera ta konosi, e ehérsito merikano a marcha lihé-lihé pa Peenemúnde - unda e kohetenan ei tábata wèrdo konstrui i lansá - pa haña Wernherr von Braun i su staf i bula nan stret Merka, pa nan por a sigui desaroyá nan kè'i hungan'ei aya. Pasobra e motibo primordial di Wernherr von Braun tábata desaroyá kohetenan pa yega den espasio, ku navenan spasial. Asina ku nos por wèl 'i bisa,ku NASA na Estadonan Unĩ, tin komo fundadónan e ingenieronan aleman ku por a desaroyá nan kohetenan grasias na e régimen NAZI.

     ,Otro punto importante tábata e dòkter mei-mei di nos hende evakuá, konsehando mi primo -

     Kon ku ta, mas of menos un luna despues di nos liberashon, mi tata a logra fia un garoshi ku kabai huntu ku un trahadó di kunuku na otro banda di río Ijssel, ku nos a yena ku e pòko poseshonnan ku nos a akumulá durante nos evakuashon, loke, di pursi, a tuma un par di biaha di krusa e río ku boto di rema, i asina nos a bolbe kas, sintá riba nos poseshonnan riba e garoshi, kantando di kontento. E 'ferry' pa krusa río Rijn tábata funshoná kaba i asina, despues di un 'kori di un día largo, nos a yega kas bèk...

     E kas tabatin hopi daño. Tabatin dos burako grandi di granada den e dak, ku mi tata a purba sera temporalmente ku dos pida lona grandi. Tur e bentananan tábata ful kibrá, i e portanan di paden tur a wòrdo saká afó. E okupantenan militar a uzanan pa traha un asina yamá "latrina"- esta un WC provishonal - den e hardin tras di e kas, pasobra e berpùt tábata yen. Nos a suponé ku tábata trata di militarnan di e tropanan aliá, pasobra den e kèlder bou di e kas, tabatin un kama grandi i un skopèt ku balanan ku definitibamente no tábata aleman.

     Promé ku e alemannan a Kòreku nos for di nos kas mei-mei di anochi, mi welo a tira un saku yen di moneda di oro den e mangasina tras di nos kas. E promé kos ku el a hasi ora nos a yega bèk, tábata di bai wak den e mangasina, i el a bolbe glorioso ku su saku yen-yen di moneda di oro ainda!

     E barko di mi tata tábata gesenk; mi ta suponé ku lo tábata e alemannan ku a bula un burako den su bòm, pa preveni ku e tropanan aliá por a uz'é komo medio di transporte, ma p'esei mi tata tampòko no por a uz'á ounke tábatin un skarsedat grandi di medio di transportashon; ma esei mester a warda te ku e barko por a wòrdo lantá i drechá. For di otro parti di e país a yega trùknan yen-yen di kos di yudansa, (tambe, mi mester rekonos'é, ku hopi kos inútil) asina ku despues di algun siman nos no tabatin mester mas di drumi riba flur, i sinta riba flur pa kome i bebe. Ta klaro ku esaki no ke men ku mi ke ekspresá kritika pa ku hende ku ta ofresé yudansa na hende den nesesidat, ma simpelmente ta berdat ku mei-mei di tur e artikulonan sumamente nesesarío i útil, ku a yega di otro parti di Hulanda, tambe tábatin basta porkeria i un kantidat di kos ku ningun hende tabatin mester di dje, manera pinturanan 'kitsch'. Te asta tantu, ku finalmente e outoridat lokal a organisá un rifa pa tur kos ku a keda sin parti, di modo ku tur hende, mucha inkluí, a gana un premio, ami tambe, pa e prom á i úniko biaha den mi bida. Mi ta korda ku m'a gana un pintura straño, pintá riba fùlp, di un nubia ku rant kla, ku e dicho hulandes: "Achter de wolken schijnt altijd de zon"- tras di e nubianan, solo semper ta briya. Mi no sa unda el a keda. Elfie Jurgens su pintura ta den famía ketu bai.

     Henter e pueblo a sufri mashá hopi daño, debí na e ácho ku el a keda probabelmente trente di bataya durante hopi luna. Kasi tur kas i edifisionan mester a wòrdorestourá, ounke hopi di e kasnan a sufri tantu daño, ku nan mester a wòrdobashá abou. E outoridat provishonal tambe kier a basha nos kas abou, ma mi tata a insisti pa e wòrdorápará. Te ainda e t 'ei, i unn di mi ruman-hombernan ta biba den dje, desde ku el a kumpr'é di mi mama, ku konsentimento di nos tur.

Misa katóliko na kuminsamento di nos kaya, tambe mester a wòrdo demolí, pasobra alemannan a laga e toren kai den dje ora nan a bul'é. Pásei nan a haña permit di e Doño di un garashi grandi pa uz'é komo misa provisorio.

     Frankamente papiá, ta un milaguer ku ningun aksidetne serío a pasa e tempo ei, despues ku nos a bolbe kas bèk, pasobra e lugá tábata berdaderamente pestá di minanan di tera i di otro kö'i eksplosibo militar. Manera, un día, anos, muchanan, a deskubrí un gran kantidat di granada mortir, i den nos lógika infantil, nos a disidí ku nan tábata peligroso, asina ku, segun nos, lo tábata mihó pa nos deshasí di nan, dor di tira nan den un dam di awa profundo, no muchyu leu tras di nos kas. Aya, probabelmente nan ta drumi te día di awe, ounke e dam ei a keda gedèmpel. Bon konsiderá, no tábata trata di un dam, ma di un burako grandi den tera, di unda e fábrikanan di klinker tábata saka nan klei, pa traha nan klinker. E tempo ei, nos tábata landa den dje i Kòreun kanoa, trahá di mitar tanki di punta di hala di e oroplanonan aliá,ku nan tábata laga kai ora nan tábata bashi. Un hende a sag e na su largura, asina ku tábata keda dos kanoa kasi sin peso, i nos a kolga un pida plomo bou di dje, pa want'é stabil. Ami tábata un di e pòko mucha ku por akòre den dje sin bolter. Ningun hende a siña nos landa; nos tábata siña nos mes, tin biaha ku nos mamanan ta wak nos morto spantá. Mas tantu, sin embargo, nan no tábatin tempo pa bin wak nos.

     Mas of menos un aña despues, un kunukero a pèrdè tur su dos pianan, ora el a move un trapi den su kunuku di palu di fruta, i a pon'é nèt riba un mina di tera i un yongkuman, ku a bai bishitá su komprometida den su outo, a wòrdo lansá ku outo ku tur na otro banda di e kurá di e kas, ma ounke su outo a keda total loss, e mes a keda fisikamente ileso.

     Mi amigo mas intimo - ku sosegá na pas - tabatin dieskuater aña ora e, i algun otro mucha aya banda, a deskubrí un montón di mina di tera. Nan a avisá Doño di e tereno, ku na su turno a avisá e servicio ku a wòrdo lantá e tempo ei pa deshasi e lugá di eksplosibo. Bo tapuntra bo mes kon e henden'ei por tábata asina bobo, ma nan a pidi mi amigo pa munstra nan unda e eksplosibonan tábata ta, i a kuminsá ku nan esfuerso pa desmantelá nan, ora henter e monton a eksplotá. Mi amigo tábata e úniko sobrebibiente! El a pèrdè su bista i su tambúnan di horea a sker i el a keda den hospital pa un tempo hopi largo. No obstante, mi no a konosénunka un gai mas prèpt kuné. Finalmente, na edat di 68, el a muri komo konsekuensia di kánser kousá pa asbest, ounke e nunka a traha ku asbest, ma te den e añanan ochenta, manera tur hende lo sa, asbestos tábata wòrdouzá tur kaminda, i ningun hende tábata sa ku e tábata peligroso.

     Te día di awe, kasi setenta aña despues, bòm di e forsanan aliá i aleman, ketu bai ta wòrdodeskubri aki aya, tambe na Bálgika i Alemania.

     Servisio di salú públiko a fumigá henter e pueblo ku DDT - otro di e substansianan ku ya kaba a keda prohibi pa basta aña kaba ma ku e tempo ei tábata e úniko medio pa mata bichinan manera pieu, pruga, kakalaka i otro bichi. Sobra dje, den mondi i kunukunan, nan a haña hopi kadáver di animalnan, ku mester a wòrdodeshasi di nan, i ta ávidente ku raton i djaka a gosa di ousensia di e poblashon humano pa reprodusi na grandi.

     Komo konsekuensia di e echo ei, e tempo ei, hopi hende, prinsipalmente mucha a muri di tur klasa di malesanan strana, manera dos di mi primonan mas chikito ku mi mes, ku a muri riba mesun día di difteria, den kas di mi omo banda di esun di nos. Hopi otro hende a sufri di tyfus i paratyfus. (A propósito: ami a kontrahá tyfus na aña 1955 despues di mi promé bishita na Spaña!)

     Otro remarka ku mi ke hasi ta, ku tur e susedidonan hororoso no a kousa ku nos a desaroyá avershon kontra arma i kos semehante. A kontrali! Anos muchanan tábata traha imitashon di pistola i skopèt, i, dirigiendo nan riba otro nos tábata sa grita: "Paf! ... Paf! ...Paf! ... Bo ta mörto!"

     Ta papia pa su mes, ku mi a lubidá un gran kantidat di eventonan, ku tambe por tábata mashá interesante, ma mi no ke bai interogá otro hende, pa mi por a skirbi un buki kompleto, maske tin hende ku ta bisá mi ku mi mester a hasi esei sí. Mi no sa. Tin tantu relato skirbi kaba, ku mi ke sa ku tin muchu hopi kaba. No obstante, mi ta spera ku mi relato personal tábata interesante pa bo.