Lo bo no haña akí e ingeniero i inventor Henk de Beijer, ku ta biaha ront mundo pa propagá energía alternatibo, te asta na nos isla ruman Bonaire, ma sí esun sin bista, ku tábata ta okupá pa binti aña largo den desaroyo di servisionan pa hende sin bista i hende ku bista limitá,na Aruba i den e área di Caribe.
Probabelmente, nos lo ta famía leu di otro, manera ku e por ta bisañeto di un primo di mi wela, por ehempel. Ta ken lo sa?
Kon ku bai bini, nos tur dos lo ta kasi sigur desendiente hopi leu di un tal Johannes de Beijer, ku tambe tábata yama su mes "de Bavari". Den un buki tokante famía De Beijer, - ku ta den poseshon di e archibo di e asosiashon Mosaic na Kleve (Alemania) - nos por lesa ku un tal Johannes de Beijer a wòrdo menshoná komo un di esnan ku tábata kompañá Catharina, yiu-muhé di Albert I, duke di Bavaria (= Beieren, ku a drenta enlase matrimonial na aña 1379 ku Willem, duke di Gulik i Gelre na Hulanda. Huntu ku e dukesa akí, lo tábata e patriarka di famía "de Beijer", Johannes de Beijer, na latin: "De Bavari", ku a nase na aña 1349 i ku tábata Eques auratus (es ta: Hidalgo di e Flishi di Oro) di Sta. Cecilia. Su kasá Maria van Lathem a enrikesé ku diessinko yiu-homber i nuebe yiu-muhé.
Esun ku ke sa mas di e historia akí, i ku sa lesa aleman, por bai na e siguiente link:
Mi a nase día 7 di yüli 1932 den e pueblo mashá bieu di Gendt, situá den e birada di río Waal, den e region Over Betuwe na Hulanda. Nomber i fam di mi kasá ta: Marina Felicia Mathilda. "Mathilda" ta su fam, loke sa kousa problema, partikularmente pafó di Aruba i Antía. El a nase día 2 di yüni 1936, na Aruba. Su tata semper tábata mantené, ku su fam berdadero tábata "Stredels", ma ku un k'e otro empleado públiko di registro sivil a hasi un fout, ora di registrá nasemento di su tata, es ta, wela di mi kasá. Berdat ta, ku e tábata un yiu-di-afó, ku su tata no a registrá oficialmente, un kos basta komun e temponan ei..
Na Antía Hulasndes, - foral na Korsou - ta mashá frekuente ku nombernan di hende-muhé a bira famnan, komo konsekuensia di yiunan nasí pafó di matrimonio, ku e tatanan no tábata rekonosé, spesialmente ora e mama tábata katibo of ex-katibo.
Marina ku mi a drenta enlase matrimonial día 29 di aprel 1965 den misa katóliko di Santa Cruz, Aruba. Ora mi a pè rdè mi bista kompletamente na aña 1972 nos a disidí stablesé nos mes permanentemente na Aruba. Asina a sosodé entrante día 21 di desember di aña 1973.
Marina ku mi a konosé otro, ora el a bin studia pa yùfrou di skol - manera nan tábata yama su ofishi e tempo ei - den e internado di e monhanan Dominicanessen na Reuver, Limburg. E tábata bin pasa su vakansinan huntu ku mi ruman Trees na nos kas. P'esei!
E ingeniero i inventor di sistemanan pa spar energía, Henk de Beijer por wòrdu hañá riba e link akí bou: